តបតាមការចង្អុលបង្ហាញពីសំណាក់ ឯកឧត្តម អ៊ូច ភា អភិបាលខេត្តតាកែវ ប្រធានកិត្តិយស សមាគមអតីតយុទ្ធជនកម្ពុជា ខេត្តតាកែវ នារសៀលថ្ងៃទី២៥ ខែធ្នូ ឆ្នាំ២០២០ ឧត្ដមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងតាកែវ និងជា ប្រធានសមាគមអតីតយុទ្ធជនកម្ពុជាខេត្តតាកែវ លោក កេត ម៉ៅ អភិបាលស្រុកសំរោង បានដឹកនាំក្រុមការងារនាំយកអំណោយចែកជូន អតីតយុទ្ធជន ចំនួន ២០គ្រួសារនៅស្រុកសំរោង ដែលជួបការលំបាកខ្វះខាត នឹងត្រូវបានដោះស្រាយក្នុងដំណាក់កាល ការពារការឆ្លងកូវីដ-១៩ ។

ឧត្ដមសេនីយ៍ត្រី នាង សុភារ៉ា បានលើកឡើងថា សម្ដេចអគ្គមហាសេនាបតីតេជោហ៊ុនសែន គឺជាវីរបុរសរបស់កម្ពុជាយើង និងជាប្រធានសមាគមអតីតយុទ្ធជនកម្ពុជា ដែលជាស្ថាបនិកនយោបាយឈ្នះឈ្នះ នាំមកនូវសន្តិភាព និងការឯកភាពជាតិពេញលេញ ហើយបាននាំនាវាកម្ពុជាប្រែក្លាយពីប្រទេសដែលកំសត់មកជាប្រទេសដែលកំពុងអភិវឌ្ឍន៍មានការរីកចម្រើនលើគ្រប់វិស័យនិងនៅលើឆាក អន្តរជាតិ ដែលគេទទួលស្គាល់ថាកម្ពុជាតូចតែកម្ពុជាខ្លាំង។

លោកមេបញ្ជាការ ប្រធានសមាគម បានបន្តទៀតថា អំណោយដែលនាំយកមកចែកជូននៅពេលនេះជាអំណោយរបស់ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានផ្ដល់មកតាមរយៈតំបន់ប្រតិបត្តិការសឹករងតាកែវ ដើម្បីចែកជូនដល់គ្រួសារអតីតយុទ្ធជន ដែលមានជីវភាពខ្វះខាតទីទ័លលំបាក ចំនួន ២០គ្រួសារ ។

លោកមេបញ្ជាការ បានផ្ដាំផ្ញើសាកសួរសុខទុក្ខ និងការយកចិត្តទុកដាក់ពីប្រមុខថ្នាក់ដឹកនាំ និងបានដោះស្រាយការលំបាក ដល់អតីតយុទ្ធជនក្នុងជីវភាពប្រចាំថ្ងៃ ក្នុងនោះដែរលោកបានរំលឹកបន្ថែម ដល់បងប្អូនអតីតយុទ្ធជនទាំងអស់ត្រូវការពារជំងឺកូវីដ-១៩ ដោយអនុវត្តតាមវិធានការរបស់ក្រសួងសុខាភិបាល និងគោរពជូនពរដល់ក្រុមការងារ និងប្រជាពលរដ្ឋទាំងអស់ឲ្យជួបតែសេចក្ដីសុខ ចៀសចាកផុតពីជំងឺកូវីដ-១៩។

សូមជម្រាបជូនថា ÷ អំណោយចែកជូនអតីតយុទ្ធជនដែលជួបការលំបាកខ្វះខាតនៅពេលនេះ ក្នុងម្នាក់ៗទទួលបាន អង្ករ ៥០គីឡូក្រាម មី ២កេស ទឹកត្រី១យួរ ទឹកស៊ីអ៊ីវ ១យួ ទឹកក្រូច ១កេស ប៊ីចេង ១គីឡូក្រាម ស្កសរ ១គីឡូក្រាម និងថវិកា ៥ម៉ឺនរៀល ផងដែរ៕